എസ്.എസ്.എല്‍.സി. പരീക്ഷ മാര്‍ച്ച് 12 മുതല്‍

തിരുവനന്തപുരം: എസ്.എസ്.എല്‍.സി. പരീക്ഷ മാര്‍ച്ച് 12 തിങ്കളാഴ്ച മുതല്‍ 24 ശനിയാഴ്ച വരെയുള്ള ദിവസങ്ങളില്‍ നടത്തും. വെള്ളിയാഴ്ചകളില്‍ പരീക്ഷയില്ല. എന്നാല്‍, ശനിയാഴ്ചകളില്‍ പരീക്ഷയുണ്ട്. 2758 സെന്ററുകളിലായി 470100 കുട്ടികളാണ് പരീക്ഷയെഴുതുന്നത്.
ഏറ്റവും കൂടുതല്‍ കുട്ടികള്‍ പരീക്ഷയ്ക്കിരിക്കുന്ന സ്‌കൂള്‍: പട്ടം സെന്റ്‌മേരീസ് ഹൈസ്‌കൂള്‍ - 1,478. ഏറ്റവും കൂടുതല്‍ കുട്ടികള്‍ പരീക്ഷയ്ക്കിരിക്കുന്ന വിദ്യാഭ്യാസ് ജില്ല: തിരൂര്‍ - 35,768. ഏറ്റവും കൂടുതല്‍ കുട്ടികള്‍ പരീക്ഷയ്ക്കിരിക്കുന്ന റവന്യു ജില്ല: മലപ്പുറം - 74,726. ഏറ്റവും കുറവ് കുട്ടികള്‍ പരീക്ഷയ്ക്കിരിക്കുന്ന വി്യാഭ്യാസ ജില്ല: കുട്ടനാട് - 2,549. ഏറ്റവും കുറവ് കുട്ടികള്‍ പരീക്ഷയ്ക്കിരിക്കുന്ന റവന്യൂ ജില്ല: ഇടുക്കി - 13,333.
ഇത്തവണ രണ്ട് സിലബസിലാണ് പരീക്ഷ നടത്തുന്നത്. സ്‌കൂള്‍ ഗോയിങ് വിഭാഗത്തിന് പുതിയ സിലബസും മറ്റു വിഭാഗങ്ങള്‍ക്ക് പഴയ സിലബസും. ടൈംടേബിളിനും മറ്റു വിവരങ്ങള്‍ക്കും വിശദവിവരത്തിനും പി.ആര്‍.ഡി. വെബ്‌സൈറ്റ് സന്ദര്‍ശിക്കാം.
ഉത്തരക്കടലാസ്സുകളുടെ മൂല്യനിര്‍ണയം രണ്ട് ഘട്ടമായിട്ട് നടക്കും. ഒന്നാംഘട്ടം ഏപ്രില്‍ രണ്ടുമുതല്‍ നാലുവരെയും രണ്ടാം ഘട്ടം ഏപ്രില്‍ 9 മുതല്‍ 20 വരെയുമായിരിക്കും. ഏപ്രില്‍ 5 മുതല്‍ 8 വരെ ക്യാമ്പിന് ഇടവേളയായിരിക്കും.
ഏകദേശം 13,000 അധ്യാപകരെ ഉത്തരക്കടലാസ് മൂല്യനിര്‍ണയത്തിനായി വിവിധ ക്യാമ്പുകളിലായി നിയോഗിക്കും.
ഐ.ടി. പ്രാക്ടിക്കല്‍ പരീക്ഷ ഫിബ്രവരി 22 മുതല്‍ മാര്‍ച്ച് 5 വരെ അതത് പരീക്ഷാകേന്ദ്രങ്ങളില്‍ നടത്തുന്നതാണ്.

എസ്.എസ്.എല്‍.സി. മോഡല്‍ ചോദ്യപേപ്പറിന്   
10 രൂപ നല്‍കണം

തിരുവനന്തപുരം : സ്‌കൂള്‍ തല പരീക്ഷകളുടെ തീയതി നിശ്ചയിച്ചു. എസ്.എസ്. എല്‍.സി മോഡല്‍ പരീക്ഷ 13ന് തുടങ്ങും. ചോദ്യപേപ്പര്‍ അച്ചടി ഇപ്രാവശ്യം സര്‍ക്കാര്‍ തന്നെ അച്ചടിച്ച് നല്‍കും. ഇതിനായി 10 രൂപ വീതം ഓരോ വിദ്യാര്‍ഥിയും നല്‍കണം. എസ്.സി, എസ്.ടി, ഒ.ഇ.സി വിദ്യാര്‍ഥികള്‍ ഇത് നല്‍കേണ്ടതില്ല. ചോദ്യപേപ്പര്‍ ഡി.ഇ.ഒ മാര്‍ മുഖേന സ്‌കൂളുകളില്‍ എത്തിക്കും. ഡി.പി.ഐ യുടെ അധ്യക്ഷതയില്‍ ചേര്‍ന്ന ഗുണമേന്മാ പരിശോധനാ സമിതിയുടേതാണ് തീരുമാനം.

എല്‍.എസ്.എസ്, യു.എസ്.എസ് പരീക്ഷകള്‍ ഫിബ്രവരി 25ന് തുടങ്ങും. ഡയറ്റുകള്‍ക്കാണ് ഈ സ്‌കോളര്‍ഷിപ്പ് പരീക്ഷകളുടെ ചുമതല. ഇതിനായുള്ള പരിശീലനം ഫിബ്രവരി 21 നും 23 നും ഹെഡ്മാസ്റ്റര്‍മാര്‍ക്ക് നല്‍കും.
എട്ട്, ഒമ്പത് ക്ലാസുകളിലെ പരീക്ഷ മാര്‍ച്ച് 6, 7, 8, 27, 28, 29 എന്നീ തീയതികളില്‍ നടത്തും. മുസ്‌ലിം സ്‌കൂളുകളില്‍ ഏപ്രില്‍ 18 മുതല്‍ 26 വരെയാണ് പരീക്ഷ. ഹൈസ്‌കൂളിന്റെ ഭാഗമായുള്ളിടത്ത് ഒന്നു മുതല്‍ ഏഴു വരെയുള്ള ക്ലാസുകളിലെ പരീക്ഷ മാര്‍ച്ച് 7, 8, 27, 28, 29 തീയതികളില്‍ നടക്കും. അല്ലാത്ത സ്‌കൂളുകളില്‍ മാര്‍ച്ച് 20 മുതല്‍ 29 വരെയാണ് ഏഴാം ക്ലാസ് വരെയുള്ള പരീക്ഷ.
ഡി.പി.ഐ യുടെ അധ്യക്ഷതയില്‍ ചേര്‍ന്ന യോഗത്തില്‍ ജെ.ശശി, സലാവുദ്ദീന്‍, കെ.ഷാജഹാന്‍, കെ.ജി.ബാബു, എന്‍.ശ്രീകുമാര്‍, പി.കെ.കൃഷ്ണദാസ്, സിറിയക് കാവില്‍, ഇമാമുദ്ദീന്‍, സൈനുദ്ദീന്‍, കെ.മോയിന്‍കുട്ടി തുടങ്ങിയ അധ്യാപക സംഘടനാ നേതാക്കള്‍ പങ്കെടുത്തു.

 പത്താംക്ലാസ് മാതൃകാ ചോദ്യം 

പ്രസിദ്ധീകരിച്ചു

പുതുക്കിയ പാഠ്യപദ്ധതി അനുസരിച്ച് 2012 മാര്‍ച്ചില്‍ നടക്കുന്ന പത്താം ക്ലാസ് പൊതുപരീക്ഷയ്ക്കുള്ള മാതൃകാ ചോദ്യങ്ങളും ഉത്തരസൂചികകളും മാതൃകാ ചോദ്യപേപ്പറുകളുമടങ്ങിയ 'ചോദ്യശേഖരം' എസ്.സി.ഇ.ആര്‍.ടി. പ്രസിദ്ധീകരിച്ചു.

ഇത് ലഭിക്കുന്ന കേന്ദ്രങ്ങള്‍: തിരുവനന്തപുരം പൂജപ്പുര എസ്.സി.ഇ.ആര്‍.ടി., ഗവ. ബോയ്‌സ് എച്ച്.എസ്. ആറ്റിങ്ങല്‍, ഗവ. ബോയ്‌സ് എച്ച്.എസ്. കൊട്ടാരക്കര, ഗവ. മോഡല്‍ എച്ച്.എസ്. ആലപ്പുഴ, കത്തോലിക് എച്ച്.എസ്. പത്തനംതിട്ട, സെന്റ് ആന്‍സ് എച്ച്.എസ്.എസ്. കോട്ടയം, ഗവ. ഗേള്‍സ് ഹൈസ്‌കൂള്‍, തൊടുപുഴ, എസ്.ആര്‍.വി. എച്ച്.എസ്. എറണാകുളം, ഗവ. എച്ച്.എസ്.എസ്. തൃശ്ശൂര്‍, മോയിന്‍സ് എച്ച്.എസ്. പാലക്കാട്, ഗവ. ജി.എച്ച്.എസ്. മലപ്പുറം, മോഡല്‍ എച്ച്.എസ്.എസ്. കോഴിക്കോട്, ഗവ. എച്ച്.എസ്.എസ്. കരിയംപറ്റ, ഗവ. വി.എച്ച്.എസ്.എസ്. കണ്ണൂര്‍, ഗവ. എച്ച്.എസ്.എസ്. കാസര്‍കോട്.